പാചകം

*ചിക്കൻ കുക്ക

പേരില്ലാത്ത ഒരു ചിക്കൻ കറി ആരുന്നു ഇത്. പിന്നെ ഞാൻ ആയിട്ട് ഒരു പേര് അങ്ങിട്ടു.. കുക്കറിൽ ഉണ്ടാക്കിയ ചിക്കൻ ആയ കൊണ്ട് ചിക്കൻകുക്ക ..

രണ്ടേ രണ്ടു സ്റ്റെപ് മാത്രം - കുക്കർ അടച്ചു വച്ചു വേയിക്കുക .. കുക്കർ തുറന്നു വച്ചു വേയിക്കുക ..( രണ്ടു സ്റ്റെപ് എന്ന് പറയുമ്പോ രണ്ടു രണ്ടര ഒക്കെ വരും ) .ഏറ്റവും എളുപ്പത്തിൽ വളരെ കുറഞ്ഞ സാധനങ്ങൾ കൊണ്ട് അനായാസം ആർക്കും ചിക്കൻ കുക്ക തയ്യാറാക്കാം .
വേണ്ടപെട്ടവർ :
ചിക്കൻ - അര കിലോ ( വിത്ത്‌ സ്കിൻ ആണ് നല്ലത്. എനിക്ക് വിത്ത്‌ സ്കിൻ കാണാൻ ഇഷ്ട്ടമല്ലാത്ത കൊണ്ട് ഞാൻ വിത്ത്‌ ഔട്ട്‌ സ്കിന്നാ എടുക്കാറു )
സവാള - ഇടത്തരം രണ്ടെണ്ണം (ചെറിയതോ വലുതോ ആണേലും കൊയപ്പം ഇല്ല. ഇല്ലെങ്കിൽ ഉപേക്ഷിച്ചാലും ആരും ഒന്നും പറയില്ല )
ഉപ്പു- ആവശ്യത്തിനു
മുളക് പൊടി - നല്ല എരി ഉള്ളത് രണ്ടു ടീ സ്പൂണ്‍ ( നിങ്ങടെ എരിയോടുള്ള ഇഷ്ട്ടം അനുസരിച്ച് കൂട്ടുവൊ കുറക്കുവോ ചെയ്യാം )
മഞ്ഞൾ പൊടി - കാൽ ടീ സ്പൂണ്‍
കറി വേപ്പില - നല്ലോണം വേണം
പച്ച മുളക് - അഞ്ജാരെണ്ണം (5 -6)
വെള്ളം - ഇച്ചിരി
എണ്ണ - ആവശ്യത്തിനു
കുക്കർ - ഒരെണ്ണം
ഇളക്കാനുള്ള തവി - ഒന്ന്
മതി മതി .. തീർന്നു .. ഇത്രേം സായനം ഉണ്ടേ നമ്മുടെ സാധനം റെഡി ആണ്.. അയ്യോ ഗാസും വേണം.
ഇനി തിന്നാൻ പാകമാക്കുന്ന വിധം
step 1 :
കഴുകി വൃത്തിയാക്കി ചെറുതായി മുറിച്ച ചിക്കൻ ആദ്യം കുക്കറിൽ ഇടുക . പിന്നെ മുളക് പൊടിയും മഞ്ഞൾ പൊടിയും സവാളയും(സവാളേം മുറിക്കണം) ഉപ്പും ചേർക്കുക. തിരുമ്മി പിടിപ്പിക്കുക (വേണോങ്കിൽ ഇച്ചിരി ചിക്കൻ മസാല ചേര്ത്തോ ..കോഴി എങ്ങാനും നിര്ബന്ധം പിടിക്കുവാണേ ) . എന്നിട്ട് ഇച്ചിരി വെള്ളം ഒഴിക്കണം (ഇച്ചിരി ന്നു പറഞ്ഞാ ഇച്ചിരിയെ ഒഴിക്കാവൂ.. ) അടച്ചു വച്ച് ഗാസേൽ വച്ച് ഒറ്റ ഒരു വിസിൽ അടിപ്പിക്കുക ( രണ്ടാമത്തെ കൂടി അടിച്ചാ ചിക്കെൻ എല്ലെന്നു ഇങ്ങു ഇളകി പോരും.അമ്മാതിരി ഇളക്കു ഇളക്കണം ഇനി രണ്ടാമത്തെ സ്റ്റെപ്പിൽ)

step 2 :
ഇനി അതിന്റെ ആവി പോയതിനു ശേഷം കുക്കറിന്റെ അടപ്പ് തുറന്നു വക്കുക. അപ്പൊ നമ്മൾ ഒഴിച്ച വെള്ളത്തിനേക്കാൾ കൂടുതൽ വെള്ളവും ആയി നമ്മുടെ ചിക്കൻ നമ്മളെ നോക്കി ചിരിക്കും. അമാന്തിച്ചു നിക്കാതെ ഗ്യാസ് കത്തിച്ചു വീണ്ടും കുക്കർ എടുത്തു അടുപ്പത്തു വക്കുക. ഏതാനും നിമിഷങ്ങൾക്കുള്ളിൽ വെട്ടി തിളക്കാൻ തുടങ്ങും. നമ്മൾ തളരരുത്.. അത് തിളക്കട്ടെന്നു വക്കണം . എന്നിട്ട് ചുമ്മാ എടുത്തു വച്ച പച്ച മുളക് കാളം പൂളം കണ്ടിച്ചു അതിലേക്കു ഇട്ടു കൊടുത്ത് നമ്മൾ ആസ്വസിക്കണം.ദേഷ്യം വരുമ്പോ നാല് ഇളക്കു വേണേലും ഇളക്കിക്കോ .. ഈ വെള്ളം പതുക്കെ പറ്റാൻ തുടങ്ങും. പറ്റി തീരാർ ആകുമ്പോ നമ്മൾ എടുത്ത് വച്ച കറി വേപ്പില ചുമ്മാ വാരി വിതറണം . കറി വേപ്പില ഈ കറിയുടെ സ്വാദിന്റെ മെയിൻ ആളാണ്‌. ഞാൻ അഞ്ചു രൂപയ്ക്കു കറി വേപ്പില വാങ്ങിയാൽ നാല് രൂപേടെ എങ്കിലും ഇതി ഇടും..(അവസാനം തിന്നുമ്പോ ഞാൻ തന്നെ ഇത് പെറുക്കി മടുക്കും. ബട്ട് തളരില്ല). കറി വേപ്പിലക്ക് ശേഷം വെള്ളം വറ്റി തീരാൻ തുടങ്ങനേനു തൊട്ടു മുന്നേ കുറച്ചു എണ്ണ (വെളിച്ചെണ്ണ യോ സൻ ഫ്ലവർ ഓയിലോ ) ഒഴിച്ച് കൊടുക്കുക. വിത്ത് സ്കിൻ ചിക്കൻ ആണേ അധികം വേണ്ട . നെയ്‌ അതിൽ തന്നെ ഉണ്ടാകും. എണ്ണ ഒഴിച്ച് നല്ലോണം ഇളക്കി എടുത്താ സംഭവം റെഡിയാ .. ഇതൊരു ഡ്രൈ ഐറ്റം ആണ്. എന്നാലും അവസാനം ഇച്ചിരി പെരണ്ട് ഇരുന്നാലും വല്യ കൊഴപ്പം ഇല്ല.
കുറച്ചു കൈപ്പുണ്ണ്യം മേടിച്ചു ചേർത്താ ഇച്ചൂടെ നല്ലതാകും.. പിന്നേം പിന്നേം ചൂടാക്കി തിന്നുവാനേ ടെയിസ്റ്റ് പിന്നേം പിന്നേം കൂടും..
രണ്ടേ രണ്ടു സ്റ്റെപ്പിൽ സ്വദിഷ്ട്ടമാർന്ന ചിക്കൻ കുക്ക തയ്യാർ .

 *സേമിയ പായസം

സേമിയ 50 ഗ്രാം

പാല്‍ ഒരു ലിറ്റര്‍

പഞ്ചസാര 750 ഗ്രാം
നെയ്യ് 25 ഗ്രാം 
അണ്ടിപ്പരിപ്പ് 5 ഗ്രാം

മുന്തിരി 5 ഗ്രാം 
 കിസ്മിസ് 5 ഗ്രാം 
ബദാം 5 ഗ്രാം 
പിസ്ത 5 ഗ്രാം 
ഏലയ്ക്കാപ്പൊടി ഒരു ഗ്രാം
പാചകം ചെയ്യുന്ന വിധം :

ഉരുളിയില്‍ 15 ഗ്രാം നെയ്യൊഴിച്ച് സേമിയ ചുവപ്പു നിറത്തില്‍ വറുത്തെടുക്കുക. ഒരു ലിറ്റര്‍ വെള്ളത്തില്‍ നന്നായി വേവിച്ച് ഊറ്റിയെടുക്കുക. പിന്നീട് ഒരു ലിറ്റര്‍ വെള്ളത്തില്‍ ഒരു ലിറ്റര്‍ പാല്‍ ചേര്‍ത്ത് നന്നായി തിളപ്പിച്ച് പാട പിടിക്കാതെ കുറുക്കിയെടുക്കുക. കുറുക്കിയതില്‍ പഞ്ചസാര ചേര്‍ത്ത് തിളപ്പിച്ചതിനു ശേഷം ഊറ്റിയെടുത്ത സേമിയ പാലില്‍ ചേര്‍ത്ത് തിളപ്പിക്കുക. ബാക്കി 10 ഗ്രാം നെയ്യില്‍ അണ്ടിപരിപ്പ്,മുന്തിരി,കിസ്മിസ്, ബദാം വറുത്ത് ഇടുക.ചേര്‍ക്കുക. ഏലയ്ക്കാപ്പൊടിയും ചേര്‍ക്കുക.

*വെജിറ്റബിള്‍ കുറുമ

കാരറ്റ്- 1 എണ്ണം

ബീന്‍സ്‌- ഒരു പിടി

ഉരുളന്‍ കിഴങ്ങ് -1 എണ്ണം

ഗ്രീന്‍ പീസ്‌ - 1/4 കപ്പ്‌

കോളിഫ്ലവര്‍ - 10 ഇതളുകള്‍

സവാള-1 എണ്ണം

കപ്പലണ്ടി- 10 എണ്ണം

ചിരവിയ തേങ്ങ- ഒരു cup

പച്ചമുളക്-4 എണ്ണം

ഇഞ്ചി-ഒരു ചെറിയ കഷ്ണം

പെരുംജീരകം,

ഗ്രാമ്പു- 7

കറുക പട്ട- 1

മല്ലി

ഏലക്ക-3

കടുക്‌, എണ്ണ, ഉപ്പു, കറിവേപ്പില,മഞ്ഞള്‍പ്പൊടി-

കാരറ്റ് നടുവിലെ മുറിച്ചു ചെറിയ കഷ്ണങള്‍ ആക്കുക.

കൊളിഫ്ലോവേര്‍ ഇതളുകള്‍ ആക്കി എടുക്കുക.

ബീന്‍സ്‌ മുറിച്ചെടുക്കുക.

സവാള നീളത്തില്‍ അരിഞ്ഞ് എടുക്കുക.

പാചകം ചെയ്യുന്ന വിധം :

പച്ചക്കറികള്‍ എല്ലാം കൂടെ ആവശ്യത്തിനു വെള്ളം ഒഴിച്ച് അല്പം ഉപ്പും ചേര്‍ത്ത് വേവിച്ചെടുക്കുക.

പച്ചമുളക്, ഇഞ്ചി, മസാല എന്നിവ ചേര്‍ത്ത് തേങ്ങ നല്ലപോലെ അരച്ചെടുക്കുക.

ഒരു ചീന ചട്ടിയില്‍ എണ്ണ ഒഴിച്ചു കടുകിട്ട് പൊട്ടുമ്പോള്‍ സവാള വഴറ്റുക. വഴാന്നു വരുമ്പോള്‍ പച്ചകറികള്‍ ഇട്ടു വീണ്ടും വഴറ്റുക. അത് ഒന്ന് വഴന്നു വരുമ്പോള്‍ മഞ്ഞള്‍പൊടി ഇട്ടു ഇളക്കുക.

ശേഷം അരപ്പ് ചേര്‍ത്ത് ഇളക്കി ,ഉപ്പ്‌ ചേര്‍ത്ത് അടച്ചു വെക്കുക. അരപ്പ്‌ കഷ്ണങളില്‍ പറ്റിപിടിച്ചു കഴിഞ്ഞു ആവശ്യത്തിനു കുറുകി പാകമാകുമ്പോള്‍ അടുപ്പില്‍ നിന്നും എടുത്തു മാറ്റിവെക്കുക.

*ചിക്കന്‍ ബിരിയാണി

1. ബസ്മതി അരി : 1 കിലൊ ( 5 ഗ്ലാസ്)
2. ചിക്കന്‍ : 1കിലൊ ( 8 പീസുകള്‍)
3. പച്ച മുളക് : 6 എണ്ണം
4. ഇഞ്ചി : ഒരു വലിയ കഷണം
5. വെളുത്തുള്ളി : 10 അല്ലി
6. പശുവിന്‍ നെയ് : 4-5 സ്പൂണ്‍
7. എണ്ണ : 5-6 സ്പൂണ്‍
8. വലിയ ഉള്ളി : 8 എണ്ണം
9. മല്ലിയില : കുറച്ച്
10. പൊതിയിനയില : കുറച്ച്
11. ചെരുനാരങ്ങ : 1 എണ്ണം.
12. തക്കാളി : 3 വലുത്
13. ബിരിയാണി മസാലപ്പൊടി : 3 വലിയ സ്പൂണ്‍
14. മല്ലിപ്പൊടി : 1 സ്പൂണ്‍
15. മുളകുപൊടി : അര സ്പൂണ്‍
16. ഖരം മസാല: കാല്‍ സ്പൂണ്‍
17. അണ്ടിപ്പരിപ്പ്, മുന്തിരി : കുറച്ച്
18. കുരുമുളക്, കറുകപട്ട, ഇല, ഏലക്ക, കറുകാമ്പ് : വളരെ കുറച്ച്.
പാകം ചെയ്യുന്ന വിധം
ഉള്ളി നീളത്തില്‍ കൊത്തിയരിയുക. ഇഞ്ചി, വെളുത്തുള്ളി, പച്ചമുളക് എന്നിവ പേസ്റ്റ് രൂപത്തില്‍ അരച്ചെടുക്കുക.ഒരു പാത്രത്തില്‍ എണ്ണയൊഴിച്ച് ചൂടാകുമ്പോള്‍ അതിലേക്ക് കൊത്തിയരിഞ്ഞ ഉള്ളിയിട്ട് (മുഴുവനുമല്ല - രണ്ട് ഉള്ളിയുടെ കഷണങ്ങള്‍ ബാക്കിവെക്കുക) വഴറ്റുക. അതിലേക്ക് അരച്ചു വെച്ച പേസ്റ്റ് (ഇഞ്ചി, പച്ച മുളക്, വെളുത്തുള്ളി) ചേര്‍ക്കുക. ഒന്നു മൂത്തു വരുമ്പോള്‍ തക്കാളി ചേര്‍ത്ത് വഴറ്റുക. അതിലേക്ക് ഒന്നര സ്പൂണ്‍ ഉപ്പ് , കഴുകി വൃത്തിയാകിയ ചിക്കന്‍ കഷണങ്ങള്‍ എന്നിവ ഇട്ട് മിക്സ് ചെയ്യുക. അതിനു ശേഷം ബിരിയാണി മസാല, മല്ലിപ്പൊടി, മുളകുപൊടി, ഖരം മസാല എന്നിവ ചേര്‍ത്ത് വീണ്ടും മിക്സ് ചെയ്യുക. പിന്നെ മല്ലിയില, പൊതിയിനയില എന്നിവയും ചേര്‍ത്ത് ചുറുനാരങ്ങ കുരു കളഞ്ഞ് പിഴിയുക. ഒന്നുകൂടി എല്ലാം ചേര്‍ത്ത് ഇളക്കി നല്ല കനമുള്ള അടപ്പ് കൊണ്ട് അടച്ച് ചെറുതീയില്‍ 20 മിനുറ്റ് വേവിക്കുക.
വേറൊരു വലിയ പാത്രത്തില്‍ (വട്ട പോലുള്ളത്) പശുവിന്‍ നെയ് ഒഴിച്ച് ചൂടാക്കുക. അതിലേക്ക് ഒരുള്ളി നീളത്തില്‍ കൊത്തിയരിഞ്ഞത് ചേര്‍ക്കുക. പതിനെട്ടാം ചേരുവയും ചേര്‍ക്കുക. ഒരുമിനുട്ടിനു ശേഷം അതിലേക്ക് 7 ഗ്ലാസ് വെള്ളം ഒഴിക്കുക. (അരി അളന്ന അതേ ഗ്ലാസ്സളവ്). ഒന്നര സ്പൂണ്‍ ഉപ്പ് ചേര്‍ക്കുക. വെള്ളം തിളച്ച് വരുമ്പോള്‍ കഴ്കി വെച്ച അരി ചേര്‍ത്ത് അടച്ച് ചെരുതീയില്‍ വെക്കുക. പതിനഞ്ച് മിനുട്ട് കഴിഞ്ഞാല്‍ ഒന്നിളക്കി തീ ഒന്നു കൂടി കുറച്ച് പത്ത്-പതിനഞ്ച് മിനുട്ട് വേവിക്കുക. അപ്പോഴേക്കും വെള്ളം മുഴുവനും വറ്റി ചോര്‍ പാകത്തിനു വെന്തിട്ടുണ്ടാകും.
ചെറിയൊരു ഫ്രൈപാനില്‍ കുറച്ച് എണ്ണയൊഴിച്ച് അണ്ടിപ്പരിപ്പ്, മുന്തിരി എന്നിവ വഴറ്റി കോരിയെടുക്കുക.(അണ്ടിപ്പരിപ്പ് ചെറിയ ബ്രൗണ്‍ നിറമാകുന്നത് വരെയും, മുന്തിരി പൊങ്ങുന്നത് വരെയും മാത്രം).അതിനു ശേഷം അതേ എണ്ണയില്‍ തന്നെ ബാക്കി വന്ന ഒരുള്ളിയുടെ കഷണങ്ങള്‍ ചേര്‍ത്ത് ബ്രൗണ്‍ നിറമാകുന്നത് വരെ നല്ല തീയില്‍ വഴറ്റുക.കാതു കോരിയെടുത്ത് അണ്ടി പരിപ്പ്, മുന്തിരി എന്നിവയോടൊപ്പം വെക്കുക.
ഇപ്പോള്‍ എല്ലാം തയാറായി. ഇനി ദം ഇടുകയാണ്‍ വേണ്ടത്. വട്ടയില്‍നിന്നും മുക്കാല്‍ ഭാഗം ചോര്‍ കോരിയെടുക്കുക. ബാകിവരുന്ന ചോറിനുമുകളില്‍ തയാറാക്കിയ പകുതി ചിക്കന്‍(കോരുമ്പോള്‍ നന്നായി ഇളക്കി കോരുക) ചേര്‍ക്കുക. അതിനു മുകളിലായി വേറെ കോരിവെചിരുന്നതില്‍ നിന്നും പകുതി ചോര്‍ ചേര്‍ക്കുക. അതിനു മുകളിലായി ബാക്കി ചിക്കനും കൂടി ചേര്‍ക്കുക. പിന്നെ അതിനു മുകളിലായി ബാക്കി മുഴുവന്‍ ചോറും ചേര്‍ത്ത് മുകള്‍ ഭാഗം ഒരുപോലെ അമര്‍ത്തി വെക്കുക. അതിനു മുകളിലായി വറുത്തെടുത്ത അണ്ടിപ്പരിപ്പ്, മുന്തിരി, ഉള്ളി എന്നിവ വിതറുക. നല്ല കട്ടി അടപ്പ് കൊണ്ട് അടച്ചു വെച്ച് വളരെ ചെറിയ തീയില്‍ 15 മിനുട്ട് ദമ്മിനിട്ട് വേവുക്കുക.

യാമ്പു

ചെങ്കടല്‍ തീരത്ത് കൂടി യാമ്പുവിന്‍റെ മണ്ണിലേക്ക്...!

സൗദി അറേബ്യയിലെ മദീന പ്രവിശ്യയില്‍ ഉള്‍പ്പെട്ട ഒരു വ്യാവസായിക നഗരമാണ് യാമ്പു.ജിദ്ദയില്‍ നിന്നും ഏകദേശം മുന്നൂറു കിലോമീറ്റര്‍വരെ മാറി ചെങ്കടിലോനോട് ചേര്‍ന്നാണ് യാമ്പു സ്തിഥി ചെയ്യുന്നത്.വര്‍ഷംതോറും ഇവിടെ നടക്കുന്ന പുഷ്പമേള പ്രസിദ്ധമാണ്.ഏകദേശം ആറു മാസത്തോളം ഇവിടെ ജോലി ചെയ്യുന്നതിനിടെ ഈ ചരിത്ര നഗരത്തിന്‍റെ പല പ്രദേശങ്ങളും എന്‍റെ ക്യാമറയില്‍ ഒപ്പിയെടുക്കാനായി.പാതി നശിച്ച പഴയ കെട്ടിടങ്ങളും വീടുകളും സൗദി ഗവണ്‍മെന്‍റ് അതേപടി ഇന്നും ചരിത്ര സ്മാരകങ്ങളായി പരിരക്ഷിച്ചു പോരുന്നു.ആസൂത്രിത നഗര വിഗസന പരിപാടികളെല്ലാം തന്നെ പഴയ നഗരത്തില്‍ നിന്നും മാറി ROYALCOMMISSION ഏരിയയിലാണ്.അത് കൊണ്ട് തന്നെ പഴയ പ്രതാപങ്ങള്‍ക്കൊന്നും ഒരു കോട്ടവും തട്ടാതെ യാമ്പു അതിന്‍റെ പഴമയുടെ പുതപ്പിനുള്ളിലിന്നും സുരക്ഷിതയായി കാലത്തെ അതി ജീവിച്ച് നിലനില്‍ക്കുന്നു,

തകര്‍ന്ന ഒരു വീടിന്‍റെ ശേഷിപ്പ്

പഴയ പ്രതാപം വിളിച്ചോതുന്ന കൊട്ടാര സമാനമായ വീടുകളിലൂടെ...!

പഴമയിലും പുതുമ കൈവിടാതെ മരം കൊണ്ടുണ്ടാക്കിയ  ഒരു BALKONY

യാമ്പു റോയല്‍ കമ്മീഷനിലെ ഒരു തടാകം

പഴയ പ്രതാപം വിളിച്ചോതുന്ന കൊട്ടാര സമാനമായ വീടുകളിലൂടെ...!

യാമ്പു ബീച്ച്

യാമ്പു ബീച്ച്

വര്‍ഷംതോറും നടക്കുന്ന പുഷ്പ മേളയില്‍ നിന്ന്.

മുഖം മിനുക്കിയ യാമ്പു

യാമ്പു റോയല്‍ കമ്മീഷനിലെ ഒരു പാര്‍ക്ക്

പഴയ പ്രതാപം വിളിച്ചോതുന്ന കൊട്ടാര സമാനമായ വീടുകളിലൂടെ...!

ഇപ്പോഴും നില നില്‍ക്കുന്ന  പഴയ YANBU TOWN HOUSE

പഴയ പ്രതാപം വിളിച്ചോതുന്ന കൊട്ടാര സമാനമായ വീടുകളിലൂടെ...!

വര്‍ഷംതോറും നടക്കുന്ന പുഷ്പ മേള യില്‍ നിന്ന്.

അമേരിക്കയുടെ ഒരു പെട്രോളിയം റിഫൈനറി (സൗദി അരാംകോ യാമ്പു)

യാമ്പു വിമാനത്താവളം

യാമ്പു ബീച്ച്

പഴയ ഒരു പള്ളി

യാമ്പു ഗൂഗിള്‍ വ്യൂ

പാലക്കാട്

പാലക്കാട് വിനോദ സഞ്ചാരത്തിന്റെ വാതായനം
സഹ്യപര്‍വ്വതം കോട്ടകെട്ടി സംരക്ഷിക്കുന്ന കേരളത്തിന്റെ കോട്ടവാതില്‍ പാലക്കാട്ടാണ്. വാളയാറിലെ കുഞ്ഞുചുരം കടന്നാണ് അന്യദേശക്കാര്‍ കൂടുതലായും കേരളത്തിലെത്തുന്നത്. ഇത് കേരളത്തിന്റെ വിനോദസഞ്ചാരത്തിലേക്കുള്ള വാതായനം കൂടിയാവുന്നു. കുടുംബസമേതം പാലക്കാട് തങ്ങി കുറഞ്ഞദൂരത്തില്‍ വ്യത്യസ്തമായ വിനോദസഞ്ചാര കേന്ദ്രങ്ങള്‍ കാണാം എന്നതാണ് പാലക്കാടിലേക്ക് സഞ്ചാരികളെ ആകര്‍ഷിക്കുന്നത്. 
മഹത്തായ സംസ്‌കാരത്തിന്റെ ഓര്‍മ്മകള്‍ പേറുന്ന നിളയും, ഭവാനിയും ശിരുവാണിയും. തുഞ്ചനും കുഞ്ചനും തുടങ്ങി എം.ടി.യും ഒ.വി.വിജയനും അടങ്ങുന്ന മലയാള സാഹിത്യ പാരമ്പര്യത്തിന്റെ ശക്തി ശ്രോതസു കൂടിയാണീ മണ്ണ്. ഗ്രാമീണഭംഗികളും പാരമ്പര്യകലകളും രുചിഭേദങ്ങളും കൊണ്ട് അനുഗ്രഹീതമായ നാട് ആതിഥ്യമര്യാദകളുടെ മറുവാക്കുമാണ്. കല്‍പ്പാത്തി അഗ്രഹാരത്തിലെ കൊണ്ടാട്ടങ്ങളുടെയും അച്ചാറുകളുടെയും പിന്നെ രാമശ്ശേരി ഇഡ്ഡലിയുടെയും പെരുമ കടലിനക്കരെ എത്തിയതാണ്. നിത്യസന്ദര്‍ശകരേയും നവാതിഥികളേയും ഈ നാട് ഇരുകൈകളും നീട്ടി സ്വീകരിക്കുന്നു. പാലക്കാട് വന്നാല്‍ എന്തെല്ലാമാണ് കാണാനും അറിയാനുമുള്ളത്. നമുക്കൊന്നു ചുറ്റിയടിക്കാം..

പറമ്പി കുളം

പറമ്പിക്കുളത്ത് ചെന്നാല്‍ വന്യമൃഗങ്ങളെ ഉറപ്പായും കാണാം. കേരളത്തിലെ ഏറ്റവും മൃഗസമ്പത്തും ജൈവവൈവിധ്യവുമുള്ള വന്യമൃഗസംരക്ഷണ കേന്ദ്രമാണിവിടം. കാട്ടിലൂടെ ട്രെക്കിങ്, ബോട്ടിങ്, പ്രകൃതി പഠന ക്യാമ്പുകള്‍ എന്നിങ്ങനെ സഞ്ചാരികളെ ആകര്‍ഷിക്കുന്ന നിരവധി പാക്കേജുകള്‍ ഇവിടെയുണ്ട്. സ്ഥലം പാലക്കാട് ജില്ലയിലാണെങ്കിലും ഇങ്ങോട്ടുള്ള റോഡ് പൊള്ളാച്ചി വഴിയാണ്.പാലക്കാട് നിന്ന് നൂറുകിലോമീറ്റർ റോഡ് മാർഗം സഞ്ചരിച്ചാൽ പറമ്പികുളം കടുവാസങ്കേതത്തിലെത്താം.തമിഴ്നാട്ടിലെ പൊള്ളാച്ചി,വാൽ‌പ്പാറ പ്രദേശങ്ങളിലൂടെ കടന്നേ പറമ്പികുളത്ത് എത്താനാകൂ.ആദ്യ ചെക് പോസ്റ്റ് കടന്ന് കടുവാസങ്കേതത്തിലേക്ക് പ്രവേശിക്കുമ്പോൾ തന്നെ യാത്രികരെ സ്നേഹപൂർവം ഓർമ്മിപ്പിക്കുന്നുണ്ടായിരുന്നു;വന്യജീവികളുടെ സ്വൈര്യവിഹാരത്തിനു ഭംഗം വരുത്തുന്ന യാതൊന്നും ചെയ്യരുത്.വാഹനങ്ങൾ പതിയെ മാത്രം പോവണം.ഹോൺ മുഴക്കാനേ പാടില്ല.പാട്ട്വെച്ചും ബഹളമുണ്ടാക്കിയും അവരെ ഭയപ്പെടുഠരുത്.ആനപ്പാടിയിലെ ഇൻഫർമേഷൻ കൊണ്ടറിലെത്തുന്നതു വരെ വാഹനം നിർത്താനോ ഇടക്ക് ഇറങ്ങാനോ പാടില്ല.ചിലപ്പോൾ ജീവനു തന്നെ അപകടം നേരിട്ടേക്കാം.എന്തിനു, കടും നിറത്തിലുള്ള വസ്ത്രങ്ങൾ ധരിച്ച് ‘അടിച്ചു പൊളിച്ച്’ ആഘോഷത്തിമിർപ്പിൽ ഇടക്കെവിടെയെങ്കിലും ഇറങ്ങിയാൽ തൊട്ടടുത്ത ഈറ്റക്കാട്ടിലോ പുൽമേട്ടിലോ മേയുന്ന കാട്ടാനക്കൂട്ടമോ,കാട്ടുപോത്തോ പ്രകോപിതരായി ആക്രമിച്ചേക്കാം.അത് അവരുടെ സ്വയം പ്രതിരോധമാണു.എല്ലാമൃഗങ്ങളിൽ നിന്നും നമ്മളൊക്കെ സുരക്ഷിതമായ അകലം പാലിക്കേണ്ടതുണ്ട്.

ആളിയാര്‍ പറമ്പികുളം ഡാം തമിഴ്നാട് പണിതത്‌

സൈലന്റ് വാലി

കേരളത്തിന് പ്രകൃതിപാഠങ്ങള്‍ പകര്‍ന്നു നല്‍കിയ കന്യാവനമായ സൈലന്റ് വാലി മഴക്കാട് സിംഹവാലന്റെ ആവാസകേന്ദ്രവുമാണ്. മണ്ണാര്‍ക്കാടിനടുത്തുള്ള മുക്കാലിയിലാണ് സൈലന്റ് വാലിയുടെ പ്രവേശനകവാടം. ഇവിടെ നിന്ന് വനംവകുപ്പിന്റെ വാഹനത്തില്‍ കുന്തിപ്പുഴ വരെ സഞ്ചാരികളെ കൊണ്ടുപോകും. അവിടെ വാച്ച് ടവറും സൈലന്റ് വാലി സമരചരിത്രം വ്യക്തമാക്കുന്ന മ്യൂസിയവും മറ്റും ഉണ്ട്. ഭാഗ്യമുണ്ടെങ്കില്‍ ആന, സിംഹവാലന്‍, തുടങ്ങിയ മൃഗങ്ങളേയും കാണാം. പാലക്കാട് നിന്ന് 70 കിലോമീറ്ററാണ് ദൂരം.

നെല്ലിയാമ്പതി

"കേരളത്തിന്റെ വൃന്ദാവനം"എന്നറിയപ്പെടുന്ന മലമ്പുഴ പാലക്കാട് ജില്ലയിലെ ഒരു വിനോദസഞ്ചാര കേന്ദ്രമാണ്. മലമ്പുഴ അണക്കെട്ട്, നദി, പർവ്വത പശ്ചാത്തലം,മലമ്പുഴ ഉദ്യാനം,ചിൽഡ്രൻസ് പാർക്ക്,ഇക്കോ പാർക്ക്,ജപ്പാൻ ഗാർഡൻ,അക്വേറിയം,സ്നേക്ക് പാർക്ക്,റോപ്പ് വേ,ഫാന്റസി പാർക്ക്,സ്പീഡ് ബോട്ട് സവാരി ,തൂക്കുപാലം എന്നിവയാണ് പ്രധാന ആകർഷണങ്ങൾ .പ്രശസ്ത ശില്പിയായകാനായി കുഞ്ഞിരാമന്‍ നിര്‍മ്മിച്ച "യക്ഷി"എന്ന ശില്പം കാണികളെ ആകർഷിക്കുന്നു.

ഡാമിന്‍റെ മുകള്‍ ഭാഗം

ഡാമിനു കുറുകെയുള്ള നടപ്പാലം

അണക്കെട്ടില്‍ നിന്നും വെള്ളം ഷട്ടറുകള്‍ വഴി പുറത്തേക്ക്

ഡാമിനു മുകളിലേക്കുള്ള വഴികളിലൊന്ന്


അണക്കെട്ടില്‍ നിന്നും വെള്ളം ഷട്ടറുകള്‍ വഴി പുറത്തേക്ക്

മലമ്പുഴ ഉദ്യാനം

മലമ്പുഴ ഉദ്യാനം

മലമ്പുഴ ഉദ്യാനം

മലമ്പുഴ ഉദ്യാനം

മലമ്പുഴ ഡാം

മലമ്പുഴ ഫൗണ്ടന്‍

മലമ്പുഴ ഉദ്യാനം

മലമ്പുഴ ഉദ്യാനം

റോപ് വേ

ഉദ്യാനത്തിനുമുകളിലൂടെയുള്ള ഉല്ലാസപ്രദമായ ആകാശയാത്ര സാധ്യമാക്കുന്ന റോപ്പ് വേ,ഉദ്യാനത്തിന്റെ മുഴുവൻ സൗന്ദര്യവും ആസ്വദിക്കാന്‍ സന്ദര്‍ശകരെ സഹായിക്കുന്നു.

മലമ്പുഴ ക്രോസ് വേ

മലമ്പുഴ റോക്ക് ഗാര്‍ഡന്‍ ചിത്രം 

ഉപയോഗശൂന്യമായ വളപ്പൊട്ടുകളും, തറയോടുകളും, മറ്റ് പാഴ് വസ്തുക്കളും കൊണ്ട് നിര്‍മിച്ച തെന്നിന്ത്യയിലെ ആദ്യത്തെ റോക്ക് ഗാർഡനാണ് മലമ്പുഴയിലുള്ളത്.

മലമ്പുഴ റോക്ക് ഗാര്‍ഡന്‍ ചിത്രം

കോടമഞ്ഞും മലനിരകളും ഓറഞ്ചുമരങ്ങളും മനോഹരമായ വ്യൂപോയിന്റുകളും വന്യമൃഗങ്ങളും പക്ഷികളുമെല്ലാം ചേര്‍ന്ന് നെല്ലിയാമ്പതിയെ പാലക്കാടിന്റെ സ്വര്‍ഗഭൂമിയാക്കി മാറ്റിയിരിക്കുന്നു. നെല്ലിയാംപതിയിലേക്കുള്ള ചുരം ആരംഭിക്കുന്നിടത്തെ പോത്തുണ്ടി ജലാശയവും മനോഹരമായ കാഴ്ചയാണ്. സീതാര്‍കുണ്ടും, മാമ്പാറയും മിന്നാംപാറയും മാട്ടുമലയും കേശവന്‍പാറയുമെല്ലാമാണ് കാണേണ്ട ഇടങ്ങള്‍. സാഹസിക പ്രിയര്‍ക്ക് ട്രെക്കിങ്ങിന് പോകാം. അല്ലാത്തവര്‍ക്കു പ്രകൃതിയുടെ ശാന്തതയില്‍ സ്വച്ഛമായി താമസിക്കാം. നഗരത്തില്‍ നിന്ന് 54 കിലോമീറ്ററുണ്ടാവും ഇങ്ങോട്ടേക്ക്.

ശിരുവാണി

ശിരുവാണിയില്‍ കാടിനുനടുവില്‍ അന്തിയുറങ്ങാന്‍ പട്ട്യാര്‍ ബംഗഌവുണ്ട്. വനംവകുപ്പിന്റെ അനുമതിയോടെ മുന്‍കൂര്‍ ബുക്ക് ചെയ്യണമെന്നു മാത്രം. ഇവിടെ പകല്‍ കറങ്ങിവരികയും ചെയ്യാം. കോയമ്പത്തൂര്‍ നഗരത്തില്‍ കുടിവെള്ളമെത്തിക്കുന്ന ജലസംഭരണിയാണ് ശിരുവാണിയിലേത്. ആനയും, കടുവയും പുള്ളിപ്പുലിയും രാജവെമ്പാലയുമടക്കം നിരവധി വന്യജീവികളുള്ള കാടിനു നടുവിലാണ് ഈ സംഭരണി. സംഭരണിക്കടുത്ത് കിടങ്ങിനു നടുവില്‍ സുരക്ഷിതമായാണ് പട്ട്യാര്‍ ബംഗഌവ്. വനംവകുപ്പ് തന്നെ നിരവധി ട്രെക്കിങ് പ്രോഗ്രാമുകളും ആവിഷ്‌കരിച്ച് നടപ്പാക്കുന്നുണ്ട്. 48 കിലോമീറ്ററാണ് പാലക്കാടു നിന്ന്.

മലമ്പുഴ

കേരളത്തിന്റെ വൃന്ദാവനമായ മലമ്പുഴയില്‍ കേബിള്‍കാര്‍ സവാരി, ബോട്ടിങ്, സ്‌നേക്ക്പാര്‍ക്ക,് റോക്ഗാര്‍ഡന്‍, തുടങ്ങി ഒരു ദിവസം ചെലവഴിക്കാനുള്ള വിഭവങ്ങള്‍ തന്നെയായുണ്ട്. കുട്ടികളുമൊത്ത് ഇവിടെ എത്തിയാല്‍ ഫാന്റസി പാര്‍ക്കില്‍ കയറാന്‍ മറക്കരുത്. നഗരത്തില്‍ നിന്ന് 12 കിലോമീറ്റര്‍ സഞ്ചരിച്ചാല്‍ മതി. 

ധോണി

പതിനഞ്ച് കിലോമീറ്ററേയുള്ളു ധോണിമലനിരകളിലേക്ക് അവിടെ നിന്നും നാലു കിലോമീറ്റര്‍ ട്രെക്കിങ് നടത്തിയാല്‍ ധോണി വെള്ളച്ചാട്ടം കാണാം. പാലക്കാട്- മണ്ണാര്‍ക്കാട് റൂട്ടില്‍ തുപ്പനാട് നിന്നോ കല്ലടിക്കോട്ടില്‍ നിന്നോ തിരിഞ്ഞു പോയാല്‍ മറ്റൊരു മനോഹരമായ വെള്ളച്ചാട്ടത്തിനരികിലെത്താം- മീന്‍വല്ലം. പാലക്കാട് നിന്ന് 31 കിലോമീറ്ററും. മണ്ണാര്‍ക്കാടിനടുത്തുള്ള കാഞ്ഞിരപ്പുഴ ഡാം, മംഗലം ഡാം, നെല്ലിയാംപതിയിലേക്കുള്ള വഴിയിലെ പോത്തുണ്ടിഡാം, എന്നിവ മറ്റ് കാഴ്ചകള്‍.

പാലക്കാട് നഗരത്തില്‍ തന്നെയാണ് ചരിത്രസ്മരണകളുമായി നിലകൊള്ളുന്ന പാലക്കാട് കോട്ട. 1766 ല്‍ മൈസൂര്‍ ഭരണാധികാരിയായിരുന്ന ഹൈദരാലിയാണ് കോട്ട നിര്‍മ്മിച്ചത്. 

കൂട്ടുജീവിതത്തിന്റെ മികച്ച മാതൃകയായ പാലക്കാട് കല്‍പ്പാത്തിയിലെ അഗ്രഹാരം, അനങ്ങനടിയിലെ അനങ്ങന്‍മല, ചൂലന്നൂരിലെ മയിലാടും പാറ, ചെമ്പൈ സംഗീതഗ്രാമം, ചിറ്റൂര്‍ ഗുരുമഠം, കുഞ്ചന്‍ നമ്പ്യാരും തുള്ളലും മറക്കാത്ത കിള്ളിക്കുറിശ്ശിമംഗലം, കഥകളി സ്‌കൂള്‍ തലത്തിലേ പഠിപ്പിക്കുന്ന വെള്ളിനേഴി ഗ്രാമം, ഒളപ്പമണ്ണമന, തബലയും മദ്ദളവുമെല്ലാം നിര്‍മ്മിക്കുന്ന പെരുവെമ്പ് വാദ്യഗ്രാമം, പണ്ട് അറിവിന്റെയും ആരോഗ്യത്തിന്റെയും കേന്ദ്രമായിരുന്ന, ഇന്ന് വിനോദസഞ്ചാരത്തിന്റെ നവീന മുഖങ്ങളിലൊന്നായി മാറിയ പൂമുള്ളിമന, അങ്ങിനെ എണ്ണിയാലൊടുങ്ങാത്ത കാഴ്ചകളുടെ പൂരപ്പറമ്പാണ് പാലക്കാട്.

പാലക്കാട് സഞ്ചരിക്കുമ്പോള്‍ ഈ നാടിന്റെ രുചി കൂടി അറിയാന്‍ മടിക്കണ്ട. രാമശ്ശേരി ഇഡ്ഢലി, മംഗലാം കുന്നിലെ മുറുക്ക്, ആലത്തൂരിലെ ഉപ്പേരി, കല്‍പ്പാത്തിയിലെ വാഴത്തണ്ട്, താമരവളയം, ചുണ്ടയ്ക്ക കൊട്ടാട്ടം... പാലക്കാടിന്റെ രുചിവൈവിധ്യ പട്ടിക അങ്ങിനെ നീളുന്നു.

നാടറിഞ്ഞ് നാടിന്റെ രുചിയറിഞ്ഞ് മടങ്ങുമ്പോള്‍ നിങ്ങള്‍ ഉറപ്പായും പറയും ഞങ്ങള്‍ വീണ്ടും വരും- അതാണ് പാലക്കാടിന്റെ വശ്യത.

കേരളത്തിലെ പാലക്കാട് ജില്ലാ‍ തലസ്ഥാനത്തുനിന്ന് 60 കിലോമീറ്റർ അകലെയായി ഉള്ള ഒരു പ്രശസ്തമായ മലയും വിനോദസഞ്ചാര കേന്ദ്രവുമാണ് നെല്ലിയാമ്പതി. ഭാരതപ്പുഴയുടെയും ചാലക്കുടിപ്പുഴയുടെയും പ്രധാനപ്പെട്ട വൃഷ്ടിപ്രദേശമാണ് നെല്ലിയാമ്പതി^[1]. തേയില, കാപ്പി തോട്ടങ്ങൾക്കും ശീതളമായ കാലാവസ്ഥയ്ക്കും പ്രശസ്തമാണ് നെല്ലിയാമ്പതി^{[അവലംബം ആവശ്യമാണ്]}. പാ‍വപ്പെട്ടവരുടെ ഊട്ടി എന്ന അപരനാമത്തിലും നെല്ലിയാമ്പതി അറിയപ്പെടുന്നു. നിത്യഹരിതവനമേഖലയായ നെല്ലിയാമ്പതിയുടെ വിസ്തൃതി 82 ചതുരശ്ര കിലോമീറ്ററാണ്. ധാരാളം ചോലക്കാടുകളും പുൽമേടുകളുമുണ്ട്. ഏറ്റവും ഉയരമേറിയ പാടഗിരി സമുദ്രനിരപ്പിൽനിന്ന് 1585.08 മീറ്റർ ഉയരത്തിലാണ്. ജനുവരി മുതൽ മെയ് വരെ പകൽ തണുപ്പുകുറഞ്ഞ കാലാവസ്ഥയും ജൂൺ മുതൽ ഡിസംബർ വരെ തണുപ്പുകൂടിയ കാലാവസ്ഥയുമാണ്.

കൈകാട്ടിക്ക് അടുത്തായി പല മനോഹരമായ സ്ഥലങ്ങളും ഉണ്ട്. കേശവൻപാറ എന്ന സ്ഥലത്തുനിന്നും നോക്കിയാൽ താഴെ താഴ്വാരത്തിന്റെ മനോഹരമായ പ്രകൃതി ദൃശ്യം കാണാം. എ.വി. തോമസ് ആന്റ് കമ്പനിയുടെ മണലരൂ തെയില എസ്റ്റേറ്റ് വളരെ അടുത്താണ്. ഇന്ത്യയിൽ ഏറ്റവും കൂടുതൽ തെയില ഉല്പാദിപ്പിക്കുന്ന എസ്റ്റേറ്റ് ആണ് മണലരൂ എസ്റ്റേറ്റ്. ഇവിടെയുള്ള തോട്ട-കടയിൽ നിന്നും സന്ദർശകർക്ക് തോട്ടത്തിൽ ഉല്പാദിപ്പിച്ച തെയില വാങ്ങാൻ കഴിയും. കേരള സർക്കാർ നടത്തുന്ന ഒരു ഓറഞ്ച്, പച്ചക്കറി തോട്ടവും ഓഫീസും കൈകാട്ടിക്ക് അടുത്താണ്. ഈ തോട്ടത്തിൽ നിന്നും സ്ക്വാഷ്, ജാം, കൈതച്ചക്ക, പാഷൻ ഫ്രൂട്ട്, ഗ്വാവ തുടങ്ങിയ പഴങ്ങൾ വാങ്ങാൻ കഴിയും. വഴുതനങ്ങ, പയർ, മുളക്, ചീര തുടങ്ങിയ പച്ചക്കറികളും ഇവിടെനിന്നും വാങ്ങാം. വീക്കേ കമ്പനി നടത്തുന്ന മറ്റൊരു തെയില തോട്ടവും തെയില ഫാക്ടറിയും ഇവിടെനിന്നും അടുത്ത് ചന്ദ്രമല എസ്റ്റേറ്റിലാണ്. എല്ലാ കാപ്പി, തേയില തോട്ടങ്ങളും ഇവിടെ ആരംഭിച്ചത് ബ്രിട്ടീഷുകാരായിരുന്നു. ഇവ പിന്നീട് തദ്ദേശീയർക്ക് വിൽക്കുകയായിരുന്നു. ഈ പ്രദേശത്തെ പരിസ്ഥിതി സന്തുലിതാവസ്ഥയെക്കുറിച്ച് വളരെ ശ്രദ്ധാലുക്കളായിരുന്ന ബ്രിട്ടീഷുകാർ ഇവിടത്തെ പ്രകൃതി വിഭവങ്ങൾ ഏറ്റവും അത്യാവശ്യ ഘട്ടങ്ങളിൽ മാത്രമേ ഉപയോഗിച്ചുള്ളൂ.

ബ്രിട്ടീഷുകാർ തങ്ങൾക്കു വേണ്ടിയും തെയിലത്തോട്ടങ്ങളുടെ കാര്യസ്ഥന്മാർക്കു വേണ്ടിയും നിർമ്മിച്ച ഭവനങ്ങൾ അവയുടെ നിർമ്മിതിയിലും രൂപകല്പനയിലും വളരെ മനോഹരമാണ് . ഈ പ്രദേശത്തിന്റെ തണുത്ത കാലാവസ്ഥയ്ക്ക് യോജിച്ചതാണ്. ഭവനങ്ങളുടെ തറയും ചുമരുകളും തണുപ്പ് കടക്കാതിരിക്കാനായി തടി കൊണ്ട് പാകിയിരിക്കുന്നു. വീടുകളിൽ നെരിപ്പോടും ഉണ്ട്. ബ്രിട്ടീഷുകാരുടെ എല്ലാ വീടുകളുടെയും മുന്നിൽ നല്ല പൂന്തോട്ടങ്ങളും ഉണ്ട്.

മറ്റൊരു പ്രധാന വിനോദസഞ്ചാര ആകർഷണമാണ് സീതാർകുണ്ട്. രാമനും ലക്ഷ്മണനും സീതയും വനവാസക്കാലത്ത് ഇവിടെ ജീവിച്ചിരുന്നു എന്നാണ് വിശ്വാസം. സീത ഇവിടത്തെ കാട്ടുചോലയിൽ നിന്ന് വെള്ളമെടുത്ത് പൂജകൾ അർപ്പിച്ചു എന്നും വിശ്വസിക്കപ്പെടുന്നു. മലമുകളിൽ നിന്ന് ദൂരെനിന്നുതന്നെ സീതാർകുണ്ട് കാണാം. ദൂരെയുള്ളചുള്ളിയാർ, മീങ്കാര അണക്കെട്ടുകളും കൊല്ലങ്കോട് പട്ടണവും മലമുകളിൽ നിന്ന് കാണാൻ കഴിയും.

കേരളത്തിലെ വികസിത സ്ഥലങ്ങളിൽ നിന്ന് ദൂരെയാണെങ്കിലും ഇവിടെ ഭാരത് സഞ്ചാർ നിഗം ലിമിറ്റഡ് (ബി.എസ്.എൻ.എൽ)-ന്റെ ഒരു ടെലെഫോൺ എക്സ്ചേഞ്ജ് ഉണ്ട്. ഏറ്റവും പുതിയ ഓപ്ടിക്കൽ ഫൈബർ സാങ്കേതിക വിദ്യ ഉപയോഗിച്ച് ഡിജിറ്റൽ സാങ്കേതിക വിദ്യയിൽ പ്രവർത്തിക്കുന്ന ഈ ടെലിഫോൺ എക്സ്ചേഞ്ജ് നെല്ലിയാമ്പതിയെ പുറം‌ലോകവുമായി ബന്ധിപ്പിക്കുന്നു. ഇന്ന് ഒരു മൊബൈൽ ടവറും ഇവിടെ നിലവിലുണ്ട്. ഇടുങ്ങിയ മലമ്പാത വികസിപ്പിച്ച് വീതികൂട്ടുന്ന പണി പുരോഗമിക്കുന്നു. തെയിലത്തോട്ടങ്ങളിലെ തൊഴിലാളികളിൽ കൂടുതലും തമിഴ്‌നാട്ടിൽ നിന്നും വന്നവരാണ്. ഇവർ നാലോ അഞ്ചോ വീടുകൾ ഒരു വരിയിൽ ഉള്ള ‘പടി’ എന്ന താമസ സ്ഥലങ്ങളാണ് താമസിക്കാൻ നൽകിയിരിക്കുന്നത്. മണലരൂ എസ്റ്റേറ്റ് തൊഴിലാളികളുടെ കുട്ടികൾക്കായി ഒരു വിദ്യാലയവും തൊഴിലാളികൾക്കും അവരുടെ കുടുംബങ്ങൾക്കുമായി ഒരു ആശുപത്രിയും നടത്തുന്നു.

 

Long view of pothundy dam from Kesavan para(Aparichithan movie location)

 

Seetharkundu view point

A small pond at Kesavan Para(Aparichithan movie location)

വയനാട്

ഇടുക്കി കഴിഞ്ഞാല്‍ കേരളത്തില്‍ ഏറ്റവും കൂടുതല്‍ സഞ്ചാരികളെ ആകര്‍ഷിപ്പിക്കുന്ന ജില്ലയാണ് വയനാട്. പശ്ചിമഘട്ടത്തില്‍ സ്ഥിതി ചെയ്യുന്ന വയനാടിന്റെ ഭൂപ്രകൃതി തന്നെയാണ് സഞ്ചാരികളെ ഇവിടേയ്ക്ക് ആകര്‍ഷിപ്പിക്കുന്ന പ്രധാന കാര്യം. വിദേശികളും സ്വദേശികളുമടക്കം വളരെ ദൂരെ നിന്നും എത്തിച്ചേരുന്നവരും ഓടിച്ചെന്ന് ഒരു വീക്കെന്‍ഡ് ആഘോഷം തട്ടിക്കൂട്ടാനൊരുങ്ങുന്നവരും ഒരുപോലെ ഇഷ്ടപ്പെടുന്നതാണ് വയനാടിന്റെ പ്രത്യേകതകള്‍.കനത്ത പാരമ്പര്യത്തിന്റെ ചരിത്രം പറയാനുള്ള വയനാടന്‍ മണ്ണും, ഇടതിങ്ങിയ കാടുകളും പ്ലാന്റേഷനുകളും ഇവിടം സഞ്ചാരികള്‍ക്ക് പ്രിയങ്കരമാക്കുന്നു. ടൂറിസത്തിന്റെ പുതിയ കാലത്തിന്റെ വാഗ്ദാനം കൂടിയാണ് വയനാട് എന്നുപറഞ്ഞാല്‍ അതിശയോക്തിയാകില്ല. ലക്ഷ്വറി റിസോര്‍ട്ടുകളും ആയുര്‍വേദ ചികിത്സയുടെ കേന്ദ്രങ്ങളും പ്രകൃതിജന്യ സുഗന്ധദ്രവ്യങ്ങളുമായാണ് വയനാട് അന്താരാഷ്ട്ര വിനോദസഞ്ചാര ഭൂപടത്തില്‍ ശ്രദ്ധ നേടുന്നത്. പാരമ്പര്യത്തിന്റെയും സംസ്‌കാരത്തിന്റെയും കാഴ്ചകള്‍ക്കൊപ്പം പുതിയ സമവാക്യങ്ങളും ചേരുന്ന വയനാടന്‍ യാത്ര ജീവിതത്തിലെ മനോഹരമായ ഓര്‍മകള്‍ നല്‍കുന്ന ഒന്നായിരിക്കും എന്ന കാര്യത്തില്‍ സംശയമില്ല.

മനംമയക്കുന്ന വനചാരുതയുടെ ദൃശ്യഭംഗിയില്‍ കുറുവ ദ്വീപ് സഞ്ചാരികളുടെ പറുദീസയായി മാറുകയാണ്. ഇന്ത്യയിലെ ആള്‍പ്പാര്‍പ്പില്ലാത്ത ഏറ്റവും വലിയ ദ്വീപില്‍ വിരുന്നെത്തുന്നവരുടെ എണ്ണം നാള്‍ക്കുനാള്‍ കൂടുന്നു. കബനിയുടെ കൈവഴികളില്‍ ഇഴപിരിഞ്ഞ് പ്രകൃതി മുഖം നോക്കുകയാണ് ഇവിടെയുള്ള ചെറുദ്വീപുകളില്‍. മാനത്തേക്ക് ശിഖരം നീട്ടുന്ന മുത്തച്ഛന്‍ മരങ്ങളും വനപുഷ്പങ്ങളും കുളിരുപകരുന്ന കാട്ടുവഴികളും നഗരത്തിരക്കില്‍നിന്നെത്തുന്ന സഞ്ചാരികളുടെ മനംകവരുന്നു.

വയനാട്ടിലെ ജലവിനോദസഞ്ചാരത്തിന്റെ സാധ്യതകള്‍കൂടിയാണ് കുറുവയില്‍ പ്രതിഫലിക്കുന്നത്. തടാകങ്ങളിലെ കുളിരില്‍ ഇത്തിരി നേരം ചെലവിടാന്‍... പ്രകൃതിയുടെ മടിത്തട്ടില്‍ വിശ്രമിക്കാന്‍ അയല്‍ സംസ്ഥാനങ്ങളില്‍നിന്നുപോലും സഞ്ചാരികള്‍ കൂട്ടമായി എത്താറുണ്ട്. 950 ഏക്കര്‍ വിസ്തീര്‍ണമുള്ള ദ്വീപില്‍ അനേകം ചെറു ജലാശയങ്ങളുണ്ട്. മഴക്കാലത്ത് കഴുത്തിനൊപ്പം വെള്ളത്തില്‍ മുങ്ങി ദ്വീപ് അപാരമായ വിദൂരക്കാഴ്ചകള്‍ നല്‍കും. സപ്തംബര്‍ പിന്നിടുന്നതോടെ കബനിയുടെ ഓളങ്ങള്‍ കടന്ന് ദ്വീപിലേക്കുള്ള യാത്രകള്‍ തുടങ്ങും. പിന്നീട് മഴക്കാലമെത്തുന്നതുവരെയും നിലയ്ക്കാത്ത പ്രവാഹം. 

ജൈവമണ്ഡലത്തില്‍നിന്ന് അനുദിനം പിന്‍വാങ്ങുന്ന നൂറുകണക്കിനു സസ്യങ്ങളുടെയും ചെറുപ്രാണികളുടെയും ആവാസകേന്ദ്രം കൂടിയാണിത്. കാടിന്റെ തനതു സംഗീതത്തിനു കാതോര്‍ക്കാന്‍ സഞ്ചാരികള്‍ ഇവിടെ നിശ്ശബ്ദരായി നടന്നു നീങ്ങുന്നു. പുഷ്പിക്കുന്ന വന്‍ മരങ്ങളും കരിമരുതും ഓര്‍ക്കിഡുകളും ഇവിടെ ധാരാളമായി കാണാം.

കൃത്രിമങ്ങളില്ലാത്ത കാട്ടറിവിന്റെ വശ്യത നുകരാന്‍ പ്രകൃതിപഠനയാത്രികരും വയനാട്ടിലേക്ക് ചുരം കയറുന്നു. ഒക്ടോബര്‍ ആകുന്നതോടെ കടല്‍ കടന്നും ദേശാടനക്കിളികള്‍ ഈ ദ്വീപിലേക്ക് വിരുന്നുവരാറുണ്ട്. ദ്വീപുകളുടെ തീരത്ത് ദിവസങ്ങളോളം ചെലവഴിച്ചാണ് വിദേശീയരായ ഈ സഞ്ചാരികളുടെ തിരിച്ചുപോക്ക്.

കടുത്ത വേനലിലും സൂര്യപ്രകാശം കടക്കാത്ത, വന്‍മരങ്ങള്‍ കുടചൂടിയ തണലോരങ്ങള്‍ യാത്രയുടെ വയനാടന്‍ അനുഭവങ്ങള്‍ അവിസ്മരണീയമാക്കുന്നു. മുളം ചങ്ങാടങ്ങള്‍ കൂട്ടിക്കെട്ടി കബനിനദിയിലൂടെ കുറുവയെ ചുറ്റിക്കാണാന്‍ റിവര്‍റാഫ്റ്റിങ് ഇവിടെ ഏര്‍പ്പെടുത്തിയിട്ടുണ്ട്. മണിക്കൂറിനു മൂന്നൂറ് രൂപ നല്‍കിയാല്‍ ഓളപ്പരപ്പിലൂടെ സഞ്ചാരികള്‍ക്കു യാത്ര ചെയ്യാം. പത്തോളം പേരെ ചങ്ങാടത്തില്‍ കയറ്റിയുള്ള ഈ സാഹസിക ജലയാത്ര സഞ്ചാരികള്‍ക്കു പ്രിയപ്പെട്ടതാണ്.

റോഡ് ഒടിച്ചു മടക്കുന്നതുപോലെയുള്ള ഒമ്പത് മുടിപ്പിന്‍ വളവുകളും അനേകം ചെറുവളവുകളും നിറഞ്ഞ പാതയാണ് വയനാട് ചുരത്തിലേത്. അടിവാരത്തുനിന്ന് കയറാന്‍ തുടങ്ങി അഞ്ചാം മുടിപ്പിന്‍ വളവിലെത്തിയാല്‍ പിന്നെ മുകളിലെത്തുവോളം റോഡിന്റെ ഇരു ഭാഗത്തും നിബിഡവനമാണ്. കാടിന്റെ കുളിര്‍മയും അതിലെ ജൈവ വൈവിധ്യങ്ങളുടെ നേര്‍ക്കാഴ്ചയും സഞ്ചാരികളെ ത്രസിപ്പിക്കും. കാട്ടുവള്ളികള്‍ തൂങ്ങി നില്‍ക്കുന്ന വന്‍മരങ്ങള്‍ ഇടതൂര്‍ന്നു നില്‍ക്കുന്ന കാടിന്റെ സ്വാഭാവികമായ വശ്യഭംഗി ചുരത്തിലൂടെ വരുന്ന സഞ്ചാരികളെ വിസ്മയിപ്പിക്കും. വേനലില്‍ നീരൊഴുക്കു നിലച്ചെങ്കിലും ചുരത്തിലെ കാട്ടു ചോലകള്‍ ആപ്രകൃതിദൃശ്യങ്ങള്‍ക്ക് ഭംഗി പകരുന്നതാണ്. അതിലെ നീരൊഴുക്കില്‍ കാടിന്റെ തണുപ്പ് തൊട്ടറിയാം.

കാഴ്ചകള്‍ കണ്ട് മുന്നേറി മുകളിലെ ഒമ്പതാം വളവും പിന്നിട്ട് മുമ്പോട്ടു വരുമ്പോള്‍ വ്യൂ പോയന്റ് കാണാം. താഴ്‌വാരക്കാഴ്ചകളിലേക്ക് മിഴി തുറക്കാന്‍ ഇവിടെയാണ് സൗകര്യം. അടിവാരത്തു നിന്നു വളഞ്ഞു പുളഞ്ഞു കയറിവരുന്ന റോഡും അതിലൂടെ ഉറുമ്പ് നടക്കുന്നതാണെന്നു തോന്നിക്കുമ്പോലെ വാഹനങ്ങള്‍ കയറി വരുന്നതും രസകരമായ കാഴ്ചയാണ്.

ദൂരെയുള്ള പട്ടണങ്ങളും കെട്ടിടങ്ങളും കൃഷിസ്ഥലങ്ങളുമെല്ലാം നിറഞ്ഞ് മനോഹരമായ കാഴ്ചയാണ് ഇവിടെ ലഭിക്കുക. വൈകുന്നേരമായാല്‍ അറബിക്കടലില്‍ സൂര്യന്‍ താഴുന്ന ഒരസ്തമന ദൃശ്യത്തിന്റെ ദൂരക്കാഴ്ചയും ചേതോഹരമാണ്.

കോഴിക്കോട്ടു നിന്ന് 44 കിലോമീറ്റര്‍ സഞ്ചരിച്ചാല്‍ അടിവാരത്തെത്താം. 12 കിലോമീറ്ററാണ് ചുരം റോഡിന്റെ ദൈര്‍ഘ്യം. വയനാട് ജില്ലയുടെ അതിര്‍ത്തിയായ ലക്കിടിയിലേക്കാണ് റോഡ് ചെന്നുചേരുന്നത്. ഇവിടെ നിന്നും വയനാട്ടിലെ വിവിധ വിനോദസഞ്ചാര കേന്ദ്രങ്ങളിലേക്ക് പോകാം. ചുരത്തില്‍ നിന്ന്അടിവാരത്തെത്തി ആറ് കിലോമീറ്റര്‍ സഞ്ചരിച്ചാല്‍ തുഷാരഗിരി വിനോദസഞ്ചാരകേന്ദ്രത്തിലെത്താം. ഇവിടെ നിന്ന് 12 കിലോമീറ്റര്‍ കൂടി പോയാല്‍ അരിപ്പാറ വെള്ളച്ചാട്ടവും കണ്ട് മടങ്ങാം.

വയനാടിന്റെ വിനോദസഞ്ചാര ഭൂപടത്തില്‍ ഏറ്റവും ഒടുവിലാണ് ബാണാസുര സാഗര്‍ ഒരുങ്ങിയെത്തിയത്. ജില്ലയിലെ ഏറ്റവും തിരക്കേറിയ ഈ വിനോദകേന്ദ്രത്തിലെ ആരവങ്ങള്‍ അടങ്ങുന്നില്ല. മലനിരകള്‍ക്ക് അഭിമുഖമായുള്ള അണക്കെട്ടിന്റെ തീരത്ത് സഞ്ചാരികളുടെ നീണ്ട നിരകള്‍ പതിവായിരിക്കുകയാണ്.

ഓളപ്പരപ്പുകളും ചെറുദ്വീപുകളും കഴുത്തിനൊപ്പം വെള്ളത്തില്‍ മുങ്ങിനില്ക്കുന്ന കുന്നുകളും തേക്കടിക്ക് സമാനമായ വയനാടന്‍ ചിത്രങ്ങളാണ് വരയ്ക്കുന്നത്. ഏഷ്യയിലെ ഏറ്റവും വലിയ രണ്ടാമത്തെ എര്‍ത്ത് ഡാമിനു മുകളില്‍നിന്നുള്ള വിദൂരക്കാഴ്ചകള്‍ ആരുടെയും മനം കുളിര്‍പ്പിക്കും. ഹൈഡല്‍ ടൂറിസം നടപ്പാക്കിയതു മുതലാണ് ഇവിടേക്ക് സഞ്ചാരികളുടെ ഒഴുക്ക് തുടങ്ങിയത്. വൈദ്യുതിബോര്‍ഡാണ് ഇവിടെ ടൂറിസം പദ്ധതി നടപ്പാക്കുന്നത്. 

കുന്നുകളെ ചുറ്റി കണ്ണെത്താദൂരത്തേക്ക് കണ്ണാടിപോലെ ജലം കാറ്റിലുലയുമ്പോള്‍ ബാണാസുരസാഗറിനു കാന്തികൂടുന്നു. ചോലവനങ്ങളും കാട്ടരുവികളും ഏറെയുള്ള പശ്ചിമഘട്ടത്തിന്റെ കാല്‍ക്കലാണ് ഈ വിനോദകേന്ദ്രം. ജലവിനോദകേന്ദ്രമെന്ന നിലയില്‍ ആഭ്യന്തര സഞ്ചാരികള്‍ക്കും മറുനാട്ടുകാര്‍ക്കും ഒരുപോലെ ബാണാസുരസാഗര്‍ പ്രിയപ്പെട്ടതാകുന്നു. മഴക്കാലത്തും വേനലിലും ഒരുപോലെ ഇവിടെ സഞ്ചാരികള്‍ എത്തുന്നു. വന്യജീവികള്‍ സൈ്വരവിഹാരം നടത്തുന്ന താഴ്‌വാരങ്ങളായി പരിണമിക്കുകയാണ് ഈ വിനോദകേന്ദ്രം.

കഴുത്തിനൊപ്പം മുങ്ങിനില്ക്കുന്ന കുന്നിനു മുകളില്‍ ഹെറിറ്റേജ് ഹട്ടുകള്‍ നിര്‍മിക്കാനും തുരുത്തുകളിലേക്ക് റോപ് വേ സൗകര്യം ഏര്‍പ്പെടുത്താനും ഹൈഡല്‍ ടൂറിസം തയ്യാറായിട്ടുണ്ട്. 122 കോടി രൂപയുടെ വികസന പദ്ധതികള്‍ താമസിയാതെ ഇവിടെയെത്തും. 

സാഹസിക സഞ്ചാരികള്‍ക്കും ഏറെ പ്രിയപ്പെട്ടതാണ് ബാണാസുര മലനിരകള്‍. അണക്കെട്ടിനോടു ചേര്‍ന്നുള്ള ചെങ്കുത്തായ മലകള്‍ സാഹസികരെ വെല്ലുവിളിക്കും. പാറക്കെട്ടുകള്‍ താണ്ടി മലയുടെ നെറുകയിലെത്താന്‍ നിരവധി സംഘങ്ങള്‍ ഇവിടെയെത്താറുണ്ട്. ഉയരത്തിലെത്തുന്നതോടെ വയനാടിന്റെയും താഴെ നാടുകളുടെയും വിദൂരക്കാഴ്ചകള്‍ സഞ്ചാരികളുടെ മനം കുളിര്‍പ്പിക്കും.

പരിസ്ഥിതിപഠനത്തിനെത്തുന്നവര്‍ക്ക് ഈ മലനിരകള്‍ നിധിയാണ്. നീലഗിരി ബയോസ്ഫിയറില്‍ മാത്രം കണ്ടുവരുന്ന അനേകം സസ്യജാലങ്ങളുടെ കലവറ കൂടിയാണിത്. കര്‍ണാടകയില്‍നിന്നും 

മറ്റും ഒട്ടേറെപ്പേര്‍ ഇതിനായി മാത്രം ഇവിടെയത്തുന്നു.



-------------------

കൊടുംവളവുകളും അഗാധഗര്‍ത്തങ്ങളുമായി വയനാട് ചുരം കണ്ടുപിടിച്ച ആജാനുബാഹുവായ ആദിവാസി കരിന്തണ്ടന് ഒടുവില്‍ ചിത്രരൂപം. വന്യമൃഗങ്ങള്‍ നിറഞ്ഞ വന്‍മലയിലൂടെ വയനാട്ടിലേക്ക് കടക്കാന്‍ പാത കണ്ടെത്താനാകാതെ വിഷമിച്ച ബ്രിട്ടീഷുകാരെ സഹായിച്ചത് ആദിവാസി പണിയ വിഭാഗത്തിലെ കരിന്തണ്ടനായിരുന്നു.
ഇടതൂര്‍ന്ന വനത്തില്‍ കാലികളെ മേക്കുന്ന കരിന്തണ്ടന് കാനനവഴികള്‍ സുപരിചിതം. ആദിവാസികളുടെ പാരമ്പര്യവഴികള്‍ കാണിച്ചുകൊടുത്തതോടെ ബ്രിട്ടീഷ് എന്‍ജിനീയര്‍മാര്‍ ഇതിലൂടെ ചുരംപാത പണിതു. വയനാട്ടിലേക്ക് ദുര്‍ഘടപാത കണ്ടുപിടിച്ചതിന്റെ ബഹുമതി തങ്ങള്‍ക്കു നഷ്ടമാകുമെന്നതിനാല്‍ ബ്രിട്ടീഷുകാര്‍ കരിന്തണ്ടനെ കൊലപ്പെടുത്തി. ഇദ്ദേഹത്തിന്റെ ഓര്‍മക്കായാണ് ലക്കിടിയില്‍ ചങ്ങലമരം സ്ഥാപിക്കപ്പെട്ടത്.
കൊലപാതകശേഷം ചുരത്തിലൂടെ യാത്രചെയ്യുന്ന ബ്രിട്ടീഷുകാരെ കരിന്തണ്ടന്റെ ആത്മാവ് നിരന്തരം പേടിപ്പെടുത്തിയതിനാല്‍ ആത്മാവിനെ ചങ്ങലയില്‍ ബന്ധിപ്പിച്ചതാണെന്ന ഐതിഹ്യവുമുണ്ട്. പണിയ വിഭാഗത്തില്‍പെട്ട യുവാവ് ആദിവാസി മൂപ്പനായിരുന്നുവെന്നും കാലക്രമേണ കരിന്തണ്ടന്‍ എന്ന പേര് വീഴുകയായിരുന്നുവെന്നും പറയപ്പെടുന്നു.
ചങ്ങലമരവും ചുരവുമൊക്കെയായി പ്രശസ്തനാണെങ്കിലും കരിന്തണ്ടന് ഇതുവരെ ചിത്രരൂപമുണ്ടായിരുന്നില്ല. ഗോത്രവിഭാഗങ്ങള്‍ക്കിടയില്‍ പ്രവര്‍ത്തിക്കുന്ന 'പീപ്പ്' എന്ന സന്നദ്ധസംഘടന ആവശ്യപ്പെട്ടതനുസരിച്ച് മൂന്ന് വര്‍ഷത്തെ പ്രയത്നത്തിനൊടുവില്‍ താമരശ്ശേരി സ്വദേശിയായ പടിഞ്ഞാറത്തറയിലെ ആര്‍ട്ടിസ്റ്റ് അയ്യപ്പനാണ് ചിത്രം തയാറാക്കിയത്.
അടിവാരം, ചിപ്ലിത്തോട്, പഴയവൈത്തിരി എന്നിവിടങ്ങളില്‍ കരിന്തണ്ടന്റെ വംശപരമ്പരയുണ്ട്. ഇവിടത്തെ കാരണവന്മാരില്‍നിന്നാണ് കരിന്തണ്ടന്റെ രൂപഭാവങ്ങള്‍ കിട്ടിയത്. നാലര അടി ഉയരവും മൂന്നര അടി വീതിയുമുള്ള ഓയില്‍ പെയ്ന്റിങ്ങില്‍ കരിന്തണ്ടന്റ ബലിഷ്ഠ രൂപം തീര്‍ക്കാന്‍ മൂന്നുമാസമെടുത്തു. ചിത്രത്തിന്റെ രൂപരേഖ ആദിവാസി കാരണവന്മാരെ കാണിച്ച് വേണ്ട മാറ്റങ്ങള്‍ വരുത്തി. സായ്പ്പിന് വഴികാട്ടിക്കൊടുത്ത് ചുരം കയറി വന്ന് ഗാംഭീര്യത്തോടെ നില്‍ക്കുന്ന കരിന്തണ്ടനാണ് ചിത്രത്തില്‍.
മുറുക്കാന്‍ ചവക്കല്‍, കടുക്കന്‍, മുടി, പട്ടുംവളയും, അരക്കെട്ട് തുണി, ശരീര ഘടന എന്നിവക്കെല്ലാം പ്രാധാന്യമുണ്ട്. താന്‍ അവസാനം അപകടത്തില്‍പെടുമെന്ന വിശ്വാസം കരിന്തണ്ടനുണ്ടായിരുന്നുവെന്നും ചിത്രത്തിലെ മുഖഭാവത്തില്‍ അത് വ്യക്തമാണെന്നും അയ്യപ്പന്‍ മാസ്റ്റര്‍ പറഞ്ഞു.

മാര്‍ച്ച് 11ന് ആദിവാസികള്‍ ചുരത്തില്‍ കരിന്തണ്ടന്‍ സ്മൃതിയാത്ര നടത്തുന്നുണ്ട്. ലക്കിടിയില്‍നിന്ന് തുടങ്ങുന്ന കാല്‍നടയാത്ര വൈകുന്നേരം നാലരയോടെ ലക്കിടി ചങ്ങലമരത്തില്‍ സമാപിക്കും. വയനാട് ചുരത്തിന് 'കരിന്തണ്ടന്‍ ചുരം' എന്ന് പേരിടുക, കരിന്തണ്ടന്‍ പ്രതിമ സ്ഥാപിക്കുക എന്നീ ആവശ്യങ്ങളുയര്‍ത്തുന്ന യാത്രയില്‍ 500 ആദിവാസികള്‍ പങ്കെടുക്കും.

------------------------------------

ഇന്നും ആധ്യനിക നാഗരികത കടന്നു ചെല്ലാത്ത ആദിവാസി ഗോത്രസമൂഹങ്ങള്‍ ഇവിടെ ജീവിക്കുന്നുണ്ട്. കേരളത്തിലെ ഏറ്റവും പഴക്കമുള്ള ശിലാരേഖകള്‍ ഇവിടെയാണ്. അമ്പലവയലിനു സമീപം ഇടക്കല്‍ ഗുഹയിലുള്ള ശിലാചിത്രങ്ങള്‍ ചരിത്രാതീത കാലത്തു തന്നെ സമ്പന്നമായ ഒരു സംസ്‌കൃതി ഇവിടെ നിലനിന്നിരുന്നു എന്നതിന്റെ തെളിവാണ്. ദൃശ്യചാരുതയാര്‍ന്ന കുന്നിന്‍ ചരിവുകള്‍, സുഗന്ധ വ്യഞ്ജനതോട്ടങ്ങള്‍, വനങ്ങള്‍, സമ്പന്നമായ സാംസ്‌കാരിക പാരമ്പര്യം തുടങ്ങിയവയെല്ലാം വയനാടിനെ വ്യത്യസ്തമാക്കുന്നു. ഡക്കാണ്‍ പീഢ ഭൂമിയുടെ തെക്കേ അഗ്രത്താണ് വയനാടിന്റെ സ്ഥാനം ഭൗമ ശാസ്ത്രജ്ഞര്‍ അടയാളപ്പെടുത്തുന്നത്.
ചെമ്പ്ര കൊടുമുടി
സമുദ്ര നിരപ്പില്‍ നിന്ന് ഏകദേശം 2100 മീറ്റര്‍ ഉയരത്തില്‍ വയനാടിനു തെക്ക് മേപ്പാടിക്കു സമീപമാണ് ചെമ്പ്ര കൊടുമുടി സ്ഥിതി ചെയ്യുന്നത്. മലകയറ്റക്കാരുടെ ശാരീരിക ക്ഷമതയെ പരീക്ഷിക്കുന്ന ചെമ്പ്ര ഈ പ്രദേശത്തെ ഏറ്റവും ഉയരമുള്ള കൊടുമുടിയാണ്. ചെമ്പ്ര കൊടുമുടി കയറിയിറങ്ങാന്‍ ഒരു ദിവസം മുഴുവന്‍ വേണ്ടി വരും. കൊടുമുടിയുടെ മുകളില്‍ താമസിച്ചാല്‍ അവിസ്മരണീയമായ ഒരനുഭവമായിരിക്കും അത്.

ചെമ്പ്രയില്‍ താമസ സൗകര്യം ആഗ്രഹിക്കുന്നവര്‍ കല്‍പ്പറ്റയിലുള്ള ജില്ലാ ടൂറിസം കൗണ്‍സില്‍ ഓഫിസുമായി ബന്ധപ്പെടുക.

നീലിമല
വയനാടിന്റെ തെക്കുകിഴക്കേ ഭാഗത്തു സ്ഥിതി ചെയ്യുന്ന നീലിമലയിലേക്ക് കല്‍പ്പറ്റയില്‍ നിന്നോ സുല്‍ത്താന്‍ ബത്തേരിയില്‍ നിന്നോ എത്തിച്ചേരാം.
ട്രക്കിംഗിനുള്ള നിരവധി കാനന പാതകള്‍ ഇവിടെയുണ്ട്. നീലിമലയുടെ മുകളില്‍ നിന്നും മീന്‍മുട്ടി വെള്ളച്ചാട്ടം കാണാം.

മീന്‍മുട്ടി
നീലിമലയ്ക്കു തൊട്ടടുത്തായി കാണപ്പെടുന്ന മീന്‍മുട്ടി വെള്ളച്ചാട്ടത്തിലേക്ക് വയനാടിനെ ഊട്ടിയുമായി ബന്ധിപ്പിക്കുന്ന പ്രധാന വഴിയില്‍ നിന്ന് 2 കി.മീ ദൂരം മാത്രമേ ഉള്ളു. 300 മീറ്റര്‍ ഉയരത്തില്‍ നിന്നുള്ള ഈ വെള്ളച്ചാട്ടം മൂന്നു തട്ടുകളായാണ് താഴേക്കു പതിക്കുന്നത്. വയനാട് ജില്ലയിലെ ഏറ്റവും വലിയ വെള്ളച്ചാട്ടമാണ് മീന്‍മുട്ടി.

ചെതലയം
വയനാടിന്റെ വടക്കന്‍ ഭാഗത്ത് സുല്‍ത്താന്‍ ബത്തേരിക്ക് സമീപമാണ് ചെതലയം വെള്ളച്ചാട്ടം കാണപ്പെടുന്നത്. മീന്‍മുട്ടിയുമായി താരതമ്യപ്പെടുത്തിയാല്‍ ചെതലയം ചെറിയ വെള്ളച്ചാട്ടമാണ്. പക്ഷിനിരീക്ഷകരുടെയും ട്രക്കിംഗ് പ്രിയരുടെയും ഇഷ്ട സ്ഥലമാണ.് ചെതലയത്തിന്റെ പരിസര പ്രദേശങ്ങള്‍.

പക്ഷി പാതാളം
സമുദ്രനിരപ്പില്‍ നിന്ന് 1700 ലധികം മീറ്റര്‍ ഉയരത്തില്‍ ബ്രഹ്മഗിരി കുന്നുകളില്‍ വനത്തിനുള്ളിലാണ് പക്ഷിപാതാളം. ഭീമാകാരമായ പാറകള്‍ കൊണ്ട് സമൃദ്ധമായ ഇവിടെ നിരവധി ഗുഹകള്‍ കാണപ്പെടുന്നു. അപൂര്‍വ്വ പക്ഷി മൃഗാദികളും ചെടികളും നിറഞ്ഞ പക്ഷി പാതാളം മാനന്തവാടിക്കു സമീപമാണ്. തിരുനെല്ലിയില്‍ നിന്ന് നിബിഡ വനത്തിലൂടെ 7 കിലോമീറ്റര്‍ സഞ്ചരിച്ചാലേ ഇവിടെ എത്തിച്ചേരാനാകൂ. നോര്‍ത്ത് വയനാട് DFO യില്‍ നിന്ന് ഇതിനുള്ള പ്രത്യേക അനുമതിയും വാങ്ങണം.

ബാണാസുര സാഗര്‍ അണക്കെട്ട്
മണ്ണു കൊണ്ട് നിര്‍മ്മിച്ച ഇന്ത്യയിലെ ഏറ്റവും വലിയ അണക്കെട്ടാണ് ബാണാസുര സാഗര്‍. വയനാടിന്റെ തെക്കു പടിഞ്ഞാറന്‍ ഭാഗത്ത് കരലാട് തടാകത്തിനു സമീപമാണ് അണക്കെട്ട് സ്ഥിതി ചെയ്യുന്നത്.അണക്കെട്ടിന്റെ റിസര്‍വോയറില്‍ നിരവധി ചെറുദ്വീപുകള്‍ കാണാം. ഇവിടെ നിന്ന് ബാണാസുര സാഗര്‍ മലയിലേക്ക് ട്രക്കിംഗ് നടത്താവുന്നതാണ്.

വയനാടിന്റെ ഗന്ധവും ശബ്ദവും ആസ്വദിച്ചു കഴിഞ്ഞാല്‍ ഇവിടെ നിന്ന് തനിമയാര്‍ന്ന എന്തെങ്കിലും ഉല്‍പ്പന്നങ്ങള്‍ വാങ്ങാതിരിക്കാനാവില്ല. കാപ്പി, തേയില, സുഗന്ധ ദ്രവ്യങ്ങള്‍, തേന്‍, മുള ഉല്‍പ്പന്നങ്ങള്‍, ഔഷധച്ചെടികള്‍ അങ്ങനെ പലതും ഇവിടെ നിന്ന് വാങ്ങാവുന്നതാണ്.